ما تقارنيش طفلك بحد..تعرفي انك ممكن تقارني عادي جدا ما يقولش لا

مش دايما المقارنة بتكون غلط احيانا بتلفت نظرنا لمشكلة ممكن حلها بسهولة لو انتبهنا في الوقت المناسب.ويمكن بالعكس اصبحت هذه الجملة تتسبب في بعض المشاكل  منها :
اكتشف ابوان تأخر طفلهماعن الكلام وفقدانه الكثير من المهارات مثل التواصل البصري  eye contact وقت تقديم المدرسة لانهم كانوا دايما بيرجعوا اختلاف طفلهم للفروق الفردية .

طفل عمره 8شهور ولا يستطيع التحكم برأسه (يصلب راسه) والام كانت تعتقد انه ينمو بسرعته الخاصة لكن الحقيقة كان هناك ضعف بالعضلات.

مشكلتنا الحقيقية اننا بنستخدم المقارنة عشان نضايق بعض مش اكتر ..تبقى الأم قاعدة في امان الله لا بيها ولا عليها وتلاقي حمامة سلام وفاعلة خير بصوت كله حزن ..مال ابنك مش بيتكلم ليه انت اكلتي سد الحنك وانت حامل ولا ايه!! ده ابن فلانة كان راديو وهو عنده سنة....ابنك ليه ما مشيش لحد دلوقتي ابن علانة كان ولا سبايدر مان وهو 10 شهور .

وكأم واعية و مثقفة بيكون الرد:انا مش بقارن ابني بحد في فروق فردية....لكن للاسف زي ما بنستخدم المقارنة عشان نضايق بعض بردو الفروق الفردية اصبحت وسيلة لدفاع  الأم عن نفسها و طفلها ويوصل الطفل لسن المدرسة وهو مش بيتكلم واحنا في انتظار الفروق الفردية...

سرعة النمو بتختلف فعلا من مرحلة لمرحلة ومن شخص لاخر لكن كمان في عوامل بتأثر على النمو منها:

النوع :دايما بنسمع البنات بتكبر قبل الولاد ..البنات بتتكلم قبل الولاد.
الوراثة:الجينات والعوامل الوراثية مش بتتحكم بس بلون الشعر والعين والبشرة او طول وقصر القامة لا كمان تأخر الكلام ,المشي بدري او متأخر ,النسنين وغيرها كتييييير .يعني لو قارنتي طفلك باخواته او بنفسك وانت صغيرة وبعمه او خاله واولادهم انت بتشوفي تأثير الوراثة مش مقارنة بالمعنى المعروف.
االبيئة:كل ما كانت بيئة الطفل ثرية مليانة بالانشطة و التفاعل كل ما كان نموه اسرع 

يعني اعمل ايه دلوقتي اقارن ولا ما قارنش؟؟؟؟

 * المقارنة تكون منك خليكي دايما ملاحظة نمو طفلك وتطور مهاراته اعرفي في كل مرحلة المفروض يكون وصل لايه دايما بيكون في range او مدى بيحصل فيه النمو والتطور وبالمناسبة العلماء حددوا المدى ده عن طريق المقارنة بردو.

* عشان ما تقعيش تحت تأثير انتظار الفروق الفردية بدلي جملة مش بقارن و في فروق فردية بمش هقلق قبل عمر.....

ابنك مش بيمشي مش هقلق قبل سنة ونص .

ابنك مش بيتكلم مش هقلق قبل سنتين .

ابنك ما سننش...الاسنان بتبدأ من 6-9 شهور لو اتأخر هعرضه على الطبيب.

* خلي مقارنتك ايجابية شوفي المهارة الناقصة عند طفلك وابدأي نميها بتدريبات وانشطة .